Di na ikatingala

J.R. Borja General Hospital, Carmen, Cagayan de Oro City / Photo by JR

KANIADTO pa problema na gyud kaayo ang kahimtang sa JR Borja Memorial City Hospital. Busa, di gyud ta matingala kon mag-ulhos og pang-resign ang mga doctor.

Kaniadto pa nagsubwak ang mga pasyenti pero gamay ra ang mga doctor nga moatiman busa kon dunay pasyenti nga makabsan nalang sa kinabuhi tungod sa kakuwang og pagtagad, dili na gyud ta matingala ana.

Kaniadto pa nagkuwang og tambal ug uban pang supply sa ekipo, busa kon mograbe ang sakit inay maayo ang pasyenti, dili ta matingala ana.

Kaniadto pa gitinguha nga itugyan nalang ang pagdumala sa tambalanan gikan sa local nga kagamhanan ngadto sa nasudnong pangagamhanan, apan hangtod walay nahitabo.

Karon, nagbaniog na ang pagpang-resign sa mga doctor sa maong hospital. Unsa may option sa city government aron mapugngan kini ug mapadayon ang pag-atiman sa mga pasyenti.

Dunay gitanyag nga solusyon si Kongresista Rufus Rodriguez sa Segundo distrito apan gibaliwala sa pamunoan ni Mayor Constantino “Tinnex” Jaraula.

Ang tanyag ni Rodriguez mao ang paghiusa sa JR Borja Memorial City Hospital isip extension sa Northern Mindanao Medical Center.

Isalindot nato ang politika niining sitwasyona. Tan-awon daw nato ang bentaha.

Naproybahan na, ubos sa pagdumala sa city government walay nahimong kalamboan ang city hospital – inanay nga nagkaguba ang edipisyo, kuwang og kahimanan, demoralize na ang mga doctor ug mga personnel sa hospital. Sa laktod dugay nang napabayaan ang panginahanglan sa tambalanan.

Sa offer ni Rodriguez, dili pod nato maseguro nga mapundohan ba gyud ang city hospital unya mapalit ang mga panginahanglan paghimo nga modernong hospital.

Kon atong tan-awon ang NMMC, nagkulang pa man gani sa iyang mga kahimanan ug personnel.

Kining problema sa city hospital nahitabo usab sa ubang siyudad sa Pilipinas.

Nahibaw ko nga nakahibaw atong mga namunoan unsaon pagsulbad niining klase sa problema. Pero, hangtod nga dili gyud bation niining mga politiko, administrador, ug mga opisyal sa gobiyerno, ang kalisod sa doctor ug mga pasyenti diha sa publikong tambalanan, magpabilin gyud ang maong suliran.

Hinaut ko lang nga makigkompetensya na atong gobiyerno sa pribadong tambalanan aron makita nato unya ang kahapsay, epetibo, ug kamoderno sa publikong hospital. Opinyon Sun.Star